ភ្នំពេញ៖ នាព្រឹកថ្ងៃពុធ ២កើត ខែភទ្របទ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី៨ ខែកញ្ញា ឆ្នាំ២០២១នេះ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ បានអញ្ជើញដឹកនាំកិច្ចប្រជុំពិនិត្យ និងពិគ្រោះយោបល់លើសេចក្តីព្រាង ស្តីពីការរៀបចំ និងការប្រព្រឹត្តទៅរបស់ផ្នែកចំណុះ ប៉ុស្តិ៍នគរបាលច្រកទ្វារព្រំដែនអន្តរជាតិ ផ្លូវគោក ទឹក និងអាកាស។

កិច្ចប្រជុំនេះបានធ្វើឡើងនៅឯអគារ នៃអគ្គនាយកដ្ឋានអន្តោប្រវេសន៍ ដោយមានការអញ្ជើញចូលរួមពី ឯកឧត្តម ឧត្តមសេនីយ៍អគ្គនាយករងអន្តោប្រវេសន៍ ប្រធាន-អនុប្រធាននាយកដ្ឋាន និងមន្រ្តីពាក់ព័ន្ធមួយចំនួនទៀត។

មានប្រសាសន៍ក្នុងកិច្ចប្រជុំនេះ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ បានបញ្ជាក់ថាកន្លងមកអគ្គនាយកដ្ឋានអន្តោប្រវេសន៍ធ្លាប់មានបទដ្ឋានកំណត់តួនាទី ភារកិច្ច របស់ការិយាល័យ និងផ្នែកចំណុះនាយកដ្ឋានរួចហើយ ក៏ប៉ន្តែតួនាទី ភារកិច្ច សម្រាប់កំណត់ទៅដល់ប៉ុស្តិ៍ច្រកទ្វារនីមួយៗ នៅមិនទាន់មាននៅឡើយទេ ។

ឯកឧត្តម នាយឧត្តមសេនីយ៍ បានបន្តថា ហេតុដូច្នេះបានត្រូវបង្កើតឲ្យមានសេចក្តីសម្រេចស្តីពី តួនាទី ភារកិច្ច ផ្នែកចំណុះប៉ុស្តិ៍នគរបាលច្រកទ្វារព្រំដែនអន្តរជាតិ គឺដោយសារតែលក្ខណៈពិសេស របស់ប៉ុស្តិ៍នីមួយៗ គឺមិនដូចគ្នាទេ។

ក្នុងឱកាសនេះដែរ ឯកឧត្តម នាយឧត្តមសេនីយ៍ ក៏បានស្នើឲ្យឯកឧត្តម អគ្គនាយករង ប្រធាន អនុប្រធាន និងក្រុមការងារ ជួយពិនិត្យលើទម្រង់បែបបទ ឯកសារ និងជួយកែសម្រួលលើពាក្យពេជន៍ ខ្លឹមសារ ឲ្យមានលក្ខណៈសមស្របទៅតាមបទដ្ឋានគតិយុត្ត៕

 

អត្ថបទទាក់ទង

ទំព័រហ្វេកប៊ុក

កម្រងវីដេអូ