ព័ត៌មានថ្មីបំផុត


រាជធានីភ្នំពេញ៖ នាព្រឹកថ្ងៃព្រហស្បតិ៍​ ១១កើត ខែស្រាពណ៍ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី១៩ ខែសីហា ឆ្នាំ២០២១ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានអញ្ជើញដឹកនាំកិច្ចប្រជុំត្រួតពិនិត្យឯកសារពាក់ព័ន្ធនានាត្រៀមសម្រាប់កិច្ចប្រជុំប្រចាំឆ្នាំ របស់អគ្គនាយកអន្តោប្រវេសន៍ និងប្រធានកុងស៊ុលអាស៊ាន ( DGICM) ដែលនឹងប្រព្រឹត្តទៅនៅចុងខែសីហា ឆ្នាំ២០២១នេះ ដែលមានប្រទេសហ្វីលីពីនជាប្រធានអង្គប្រជុំ តាមប្រព័ន្ធវីដេអូសនិ្នសិទ Zoom ។

កិច្ចប្រជុំនេះ ក៏មានការអញ្ជើញចូលរួម​ពី ឯកឧត្តម​ ជ័យ រដ្ឋា ប្រធាននាយកដ្ឋានកិច្ចការកុងស៊ុល នៃអគ្គនាយកដ្ឋានកិច្ចការច្បាប់កុងស៊ុល និងព្រំដែន​ និងសហការី​ ផងដែរ។

ឯកឧត្តម នាយឧត្តមសេនីយ៍ បានណែនាំឲ្យក្រុមការងារ ត្រៀមរៀបចំរបាយការណ៍ឲ្យបានត្រឹមត្រូវ ច្បាស់លាស់ទៅតាមស្ថានភាពសភាពការណ៍រួម របស់ប្រទេសកម្ពុជា​ ព្រមទាំងសហការជាមួយស្ថាប័នដែលពាក់ព័ន្ធ​ ទាក់ទងទៅនឹងចំណុចណាដែលមិនច្បាស់លាស់​ ។ ឯកឧត្តម អគ្គនាយក បានឲ្យលើកឡើងពី ស្ថានភាពជនបរទេសនៅព្រះរាជាណាចក្រកម្ពុជា ជាពិសេសនៅពេលដែលពាក់ព័ន្ធនឹងស្ថានភាពជំងឺកូវីដ-១៩​ ។

ឯកឧត្តម នាយឧត្តមសេនីយ៍ ក៏បានលើកឡើងពីកិច្ចការសំខាន់ៗ ដែលកម្ពុជាបានប្រកាន់យក និងអនុវត្តចំពោះជនបរទេស លើការគ្រប់គ្រងការចេញ ចូល ការស្នាក់នៅ លើពលករបរទេស និងកិច្ចសហការនានាជាមួយប្រទេសអាស៊ាន និងអន្តរជាតិ។

ឯកឧត្តម អគ្គនាយក ក៏បានបញ្ជាក់ដល់ក្រុមការងារដែល​នឹងចូលរួមក្នុងកិច្ចប្រជុំប្រចាំឆ្នាំ របស់អគ្គនាយកអន្តោប្រវេសន៍ និងប្រធានកុងស៊ុលអាស៊ាន (DGICM) និងកិច្ចប្រជុំផ្សេងៗទៀត ត្រូវរៀបចំឯកសារ និងមតិយោបល់ប្រកបដោយ​ការទទួលខុសត្រូវ ដើម្បីធ្វើយ៉ាងណាឲ្យកិច្ចប្រជុំនេះទទួលបានផ្លែផ្កាល្អ។

ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ ក៏បានបញ្ជាក់បន្ថែមដែរថា ក្រុមការងារក៏ត្រូវគិតគូរដោយល្អិតល្អន់ អំពីទិសដៅការងារបន្ត ដែលអគ្គនាយកដ្ឋានអន្តោប្រវេសន៍កម្ពុជា នឹងត្រៀមអនុវត្ត និងអនុវត្តបន្ត ជាពិសេសគោលការណ៍បើកដំណើរការទេសចរណ៍ឡើងវិញ ក្រោយជំងឺកូវីដ-១៩ ការគ្រប់គ្រងជនបរទេសឲ្យបានកាន់តែល្អប្រសើរ និងការបន្តកិច្ចសហប្រតិបត្តិការអន្តរជាតិ ឲ្យកាន់តែប្រសើរឡើងថែមទៀត៕

អត្ថបទទាក់ទង

ទំព័រហ្វេកប៊ុក

កម្រងវីដេអូ