អគ្គនាយកដ្ឋាន អន្តោប្រវេសន៍
GENERAL DEPARTMENT OF IMMIGRATION

កិច្ចប្រជុំឆ្លងសេចក្តីព្រាងរបាយការណ៍ប្រចាំឆ្នាំ២០២៤ របស់នាយកដ្ឋានច្រកទ្វារទី២

នៅថ្ងៃព្រហស្បតិ៍ ១១រោច ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៦ ខែធ្នូ ឆ្នាំ២០២៤ នៅសាលប្រជុំអគ្គនាយកដ្ឋានអន្តោប្រវេសន៍ នាយកដ្ឋានបានបើកកិច្ចប្រជុំឆ្លងសេចក្តីព្រាងរបាយការណ៍ប្រចាំឆ្នាំ២០២៤ ក្រោមអធិបតីភាព លោកឧត្តមសេនីយ៍ឯក សារិន សារីណូ ប្រធាននាយកដ្ឋាន។ ក្នុងនោះដែរក៏មានការចូលរួមពីលោក​ លោកស្រីអនុប្រធាននាយកដ្ឋាន នាយ​ នាយរងការិយាល័យ នាយ​ នាយរងផ្នែក ពាក់ព័ន្ធ។

ជាកិច្ចចាប់ផ្តើម លោកឧត្តមសេនីយ៍ឯក ប្រធានអង្គប្រជុំបានអនុញ្ញាតឱ្យនាយការិយាល័យរដ្ឋបាលសរុបឡើងអានសេចក្ដីព្រាងរបាយការណ៍ ហើយក៏បានអនុញ្ញាតឱ្យថ្នាក់ដឹកនាំអនុប្រធាននាយកដ្ឋានចូលរួមមតិក្នុងការកែតម្រូវ ជាមួយគ្នានោះលោកក៏បានអនុញ្ញាតឱ្យនាយការិយាល័យទាំងបីឡើងរាយការណ៍ពីលទ្ធផលការងារ និងបញ្ហាប្រឈមក្នុងឆ្នាំ២០២៤ របស់ការិយាល័យនីមួយៗ។ 

ជាកិច្ចបន្ទាប់ ប្រធានអង្គប្រជុំបានមានប្រសាសន៍បូកសរុប ណែនាំការងារជំនាញ និងលើកទិសដៅអនុវត្តបន្តដូចខាងក្រោម៖

-បានណែនាំលោកនាយការិយាល័យទាំង៣ ត្រូវអនុវត្តការងារជំនាញទៅតាមឋានានុក្រម នៃការងារ

-បានណែនាំថ្នាក់ដឹកនាំអនុប្រធាននាយកដ្ឋាន នាយការិយាល័យទាំង៣ ព្រមទាំងមន្រ្តីក្រោមឱវាទទាំងអស់ត្រូវគោរពបទវិន័យនគរបាលជាតិឲ្យបានល្អប្រសើរ និងត្រូវស្លៀកពាក់ឯកសណ្ឋានឲ្យបានត្រឹមត្រូវ

-បានណែនាំថ្នាក់ដឹកនាំអនុប្រធាននាយកដ្ឋាន នាយការិយាល័យទាំង៣ ព្រមទាំងមន្រ្តីក្រោមឱវាទទាំងអស់ត្រៀមពេលវេលាសម្រាប់អនុវត្តន៍ការងារជំនាញក្នុងឆ្នាំថ្មីខាងមុខ

-បានណែនាំឱ្យយកចិត្តទុកដាក់ ពង្រឹងនូវការចេញចូលនៃជនបរទេស និងត្រួតពិនិត្យរាល់បញ្ជីមុខសញ្ញាផ្សេងៗ

-បានណែនាំក្រុមស្រង់បញ្ជីសារពើភ័ណ្ណត្រូវជម្រះរាល់សម្ភារ:ផ្សេងៗដែលខូចបាត់បង់គុណភាពប្រើលែងបានទាំងអស់

បានណែនាំការិយាល័យជំនាញរៀបផែនការដើម្បីចុះត្រួតពិនិត្យជំនាញនៅតាមបណ្តាប៉ុស្តិ៍បន្ថែមទៀត។

ជាកិច្ចបញ្ចប់ លោកប្រធានអង្គប្រជុំក៏បានប្រគល់លិខិតសរសើររបស់ អគ្គនាយកដ្ឋានអន្តោប្រវេសន៍ ជូនដល់លោក​ លោកស្រីនាយរងការិយាល័យ និងមន្ត្រីនៃការិយាល័យទាំង៣ ដែលមានស្នាដៃល្អប្រសើរក្នុងការបំពេញភារកិច្ចជូននាយកដ្ឋានប្រចាំឆ្នាំ២០២៤ កន្លងមក។

https://www.tiktok.com/@gdicambodia

https://t.me/GDIOfficial

https://www.facebook.com/GDIOfficial/

www.immigration.gov.kh