កិច្ចប្រជុំពិនិត្យពិភាក្សា លើបណ្ដឹងតវ៉ារបស់ជនបរទេសអន្តោប្រវេសន្ត នៅព្រះរាជណាចក្រកម្ពុជា និងឯកសារពាក់ព័ន្ធនានា
ភ្នំពេញ៖ នារសៀលថ្ងៃព្រហស្បតិ៍ ១៤ រោច ខែអស្សុជ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី០៤ ខែវិច្ឆិកា ឆ្នាំ២០២១នេះ ឯកឧត្តម អគ្គនាយក នៃអគ្គនាយកដ្ឋានអន្តោប្រវេសន៍ នាយឧត្តមសេនីយ៍ គៀត ច័ន្ទថារិទ្ធ បានអញ្ចើញដឹកនាំកិច្ចប្រជុំពិនិត្យ ពិភាក្សា លើបណ្ដឹងតវ៉ារបស់ជនបរទេសអន្តោប្រវេសន្ត នៅព្រះរាជណាចក្រកម្ពុជា និងឯកសារពាក់ព័ន្ធនានា ។
កិច្ចប្រជុំនេះមានការអញ្ជើញចូលរួម ដោយឯកឧត្តម អស់លោក ជាអគ្គនាយករង ប្រធាន-អនុប្រធាននាយកដ្ឋាន មន្ត្រីជំនាញ និងអ្នកបច្ចេកទេស ជាច្រើនរូបទៀត ។
ក្នុងកិច្ចប្រជុំនេះដែរ ឯកឧត្តម អគ្គនាយក គៀត ច័ន្ទថារិទ្ធ បានមានប្រសាសន៍ថា កិច្ចការដោះស្រាយបណ្ដឹងតវ៉ានេះគឺជារឿងសំខាន់ ឯកឧត្ដមបាន បញ្ជាក់ថា អ្នកធ្វើកិច្ចការដោះស្រាយបណ្ដឹងតវ៉ានេះ ត្រូវមានវិជ្ជាជីវៈ ឆន្ទៈខ្ពស់ ភាពស្មោះត្រង់ត្រឹមត្រូវ និងយុត្តិធម៌ ព្រោះការសម្រេចចិត្តថាខុសឬត្រូវ គឺជាជោគវាសនា របស់ប្រជាពលរដ្ឋដែលជាជនបរទេសរស់នៅក្នុងព្រះរាជាណាចក្រកម្ពុជា ។
ឆ្លៀតក្នុងឱកាសនោះដែរ ឯកឧត្ដម អគ្គនាយក ក៏មានការថ្លែងសរសើរចំពោះកិច្ចប្រតិបត្តិការ ដោះស្រាយបណ្ដឹងតវ៉ា ពីមុនមកនឹងមកដល់ពេលបច្ចុប្បន្ននេះ ដែលមានតម្លាភាព ស្មោះត្រង់ និងយុត្តិធម៌ ហើយឯកឧត្ដម ក៏សង្ឃឹមថាកិច្ចប្រតិបត្តិការដោះស្រាយបណ្ដឹងតវ៉ា បានល្អប្រសើជាងនេះ នឹងឆាប់បញ្ចប់នាពេលឆាប់ឆាប់ខាងមុខនេះផងដែរ ៕
